KAN PUITHIAM LAL BER ISUA

 

"Tin , Isua chu Aw ring takin a au leh a, a thlarau a thlah ta a. Tin, ngai teh, Pathian Biak in puanzar chu a chung lam atangin a hnuai lam thlengin a lo thler chhuak ta a;..."

 

Good Friday kan lo thleng leh dawn ta a, he hun kan thlen hian rilruah kan tana Lal Isua inpekna leh tuarnate kan hre chhuak fo thin. Chu chuan kan thinlungah hmun lian tak a luah a, kan thlarau nun leh Pathian tana in pe zel tura kan rilru leh ngaihtuahna min siam thar tir leh tu a ni thin. Kumin Good Friday lo thleng tur pawh hian Pathian tana inpekna thar kan neihna tur atana hmanrua lo ni thei se a duhawm hle awm e.

 

Bible-ah hian "Chhinchhiahna" (Sign) tam tak kan hmu a, ch‑‑ung zingah chuan tuna kan sawi tur hi "Chhinchhiahna" hi a pawimawh berte zing ami a ni ngei ang. Khawvel hi sual thim chhah tak hian a khuh reng a, chu sual thim thil tihtheihna chu Lal Isua inpekna (Thihna) avangin lak kian a lo ni ta, A va ropui em! Lal Isua thihna leh tawh lehna avang chuan sual thim thuneihna ata lak chhuah kan ni ta. Chu thim tak lak kian chu mitinte tana thil thleng pawimawh, chhinchhiah tlak tak a ni. Rinna vanga Isua pawmtute zawng zawng tan Isua thihna hian sual leh thim thuneihna bawiha awm Khawvel chu engah a rawn siam ta a ni. Chhandamtu Isua thih lai khan thil ropui tak tak, chhinchhiah tlak tak tak thleng a awm a, Chûng thilte chu Mathaia hian a ziak vek a ni. Chhinchhiahna pathumte hi Matthaia bung 27,chang 51-53-ah hian kan hmu thei a, chang 54-56-ah hian heng chhinchiahna hriatpuitute leh an nun a nghawng dan kan hmu a ni. Chang 51-53 atangte hian Chhinchhiahna Pathum kan hmuh thei a, chûngte chu: 

 

1)Pathian Biak In Puanzar a chung lam atangin a hnuai lam thlengin a lo thler.

1)Lir nasa takin a nghing.

2)Lir nasa taka a nghin avangin lungpuite a lo khi chat a, thlânte a lo inhawng a, chuta tang chuan mi thianghlim muhil tawhte taksa tam tak kaihthawhin an awm bawk a ni.

 

Hêng chhinchhiahna Pathum zinga a hmasa ber hi kan sawi fiah dawn a ni. Chang 51-naah hian “Ngai teh” tih thu kan hmu a, chu chuan Chhandamtu thihna a kawk a, chu thihna avang chuan Pathianin Chhinchhiahna mak dang lam tak chu a pe nghal a ni. Chhiartutena chhinchhiahna an hriat theihna turin he tawngkam hi a hmang a ni. Isua Kriata thih laia chhinchhiahna kan hmuh hmasak ber chu Pathian Biak In Puanzar thler hi a ni. Thuthlung Hlui hunah chuan Temple-a puanzar hnungah hian “Hmun Thianhlim ber” chu a awm a, “Thuthlung Bawm” pawh a awm bawk a. Chu hmunah chuan Puithiam Lal berin kumtinin Lalpa mite (Israel) tan ran thisen hmangin “Inthawina” a hlan thin a (Heb. 9:22), Chu Inthawina thisen avang chuan Lalpa mite chu an sualnaah ngaihdam an ni a, an bawlhhlawhna atangtein an lo thianghlim a, Pathian hmaah "thianghlim" an nih theihna turin  puithian kaltlanga mahni insengsovin inthawina an hlan thin a ni. Chutianga sual ngaihdamna an neihna tur leh tih thianghlim an nih theihna tur chuan Temple-a “Puanzar” chu an keuhawn ngei ngei a ngai a ni. Mathhaia ziak atanga kan hmuh theih chiang tak chu he “Puanzar thler hian” Temple-a ran thisen hmanga tih thianghlim leh ngaihdam ngai tawh lovin Lal Isua thisen avang chuan (tupawh amah ring apiang) sual ngaihdamna leh tih thianghlimna a chang thei a ni tih a en tir a ni.

 

He "chhinchhiahna" (Sign) hian Puithiam lalber chu Lal Isua, kan tana nun petu hi a ni tih chiang takin min puan chhuahsak a, Isua thihna hian chatuan atana inthawina nung, pawm tlak, Pathian lama thiam min chantirtu a nih thu min puan chhuahsak a ni……..